Математика және информатика апталығы
Бүгінгі ғылым мен техниканың қарқынды дамып, еліміздің экономикасы өсіп, үкімет үдемелі индустрияландырудың керемет жобаларын жүзеге асырып отырған кезеңде оқушылардың математика мен физика пәндерінен біліміне, компьютерлік сауаттылық деңгейіне қойылатын талап та жоғары. Болашақта білімді ұрпақ керек, ал білім кілті – барлық нақты ғылымдардың негізін меңгеруде. Себебі математикалық білімі мықты, компьютерлік сауаттылығы жоғары әрі ойлау қабілеті дамыған бала ғана ғылым мен техника тілін табысты меңгере алады. Әр баланың жеке бір ғылымға деген қабілетін ескере отырып оқыту, оны дамытудың барлық мәселелерін шешетін дайын әрі керемет әдістеме болуы мүмкін емес. Оқушылардың бойында білімге деген қажеттілікті сезіну, білім алу үшін өз бетінше іздену, жаңашылдыққа ұмтылу қасиеттерін тәрбиелеу - сабақта ғана емес, сыныптан тыс жұмыстарда да жүзеге асырылуы керек.
Осындай жұмыстың маңызды бір бағыты – пәндік онкүндік болып саналады. Қаңтар айының 17-27 күндер аралығында мектепте математика – информатика пәндер онкүндігі өткізілді. Апталықтың жоспары әдістемелік бірлестігінің отырысында қаралып талданды және бекітілді.
Апталықтың мақсаты: математика – информатика сабақтарында және сабақтан тыс іс-шараларда оқытудың заманауи тәсілдерін қолдана отырып оқушылардың білім алуға қызығушылығын арттыру, ой-өрісі мен таным белсенділіктерін жан-жақты жетілдіру.
Апталық барысында әдістеме бірлестіктің мұғалімдері мектеп фойесіне көрме шығарудан бастап, санитарлық талаптарды сақтай отырып, 5-10 сыныптарда ашық сабақтар, сыныптан тыс сабақтар, сайыс сабақтар өткізді. Апталықтың қорытындысы ретінде математикалық кеш өткізді.
Онкүндік ағымында келесі ашық сабақтар берілді:
Есқараева Алия – 8 «Б» сыныпта Геометрия пәнінен «Параллелограмның ауданы» тақырыбында ашық сабақ.
Жанкожаева Ботакоз – 9 «Ә» сыныпта Алгебра пәнінен «Тригонометриялық функциялар және олардың қасиеттері» тақырыбында ашық сабақ.
Жұманғали Сымбат – 10 «А» сыныпта Алгебра пәнінен «Көпмүшені көпмүшеге «бұрыштап» бөлу» тақырыбында ашық сабақ.
Затулла Дүйсенкүл – 5 «Ә» сыныпта Математика пәнінен «Ондық бөлшекті жай бөлшекке айналдыру» тақырыбында ашық сабақ.
Мамыралиева Ұлжан – 7 «Ә» сыныпта Алгебра пәнінен «Қысқаша көбейту формулалары» тақырыбында ашық сабақ.
Иманбек Әкімхан – 6 «Ә» сыныпта Математика пәнінен «Айнымалысы модуль таңбасының ішінде берілген бір айнымалысы бар сызықтық теңдеу» тақырыбында ашық сабақ.
Жалпы ашық сабақтардың дайындығы мен өткізілуіне тоқталатын болсақ, өткізілген алты ашық сабақтың алтауында пән мұғалімдері бір күн бұрын сабақ жоспарларын директордың ОІЖО-на тексертіп, бекітіп алды.
Ашық сабақтарды талдау қорытындысы бойынша мұғалімдерге:
- Сабақ уақытын тиімді пайдалану;
- Заманауи оқу платформаларын, бағдарламаларын көбірек пайдалану;
- Сабақ этаптарының барлығы түгел қамтылуын қадағалау бойына ұсыныстар берілді.
Сонымен қатар төмендегідей сыныптан тыс іс-шаралар өткізілді:
Есқараева Алия – 8 «А», «Б» сыныпта алгебра, геометрия пәнінен сайыс сабақ.
Абылаева Динара – 6 сынып оқушыларына информатика пәнінен «Информатика әлеміне саяхат» тақырыбында жарыс сабақ.
Избасаров Әбілда – бастауыш сынып оқушыларына «Қызықты АКТ» тақырыбында логикалық тапсырмаларды құрастыру, қабырға газеттерін шығару тапсырмаларын берді және құрастырылыған тапсырмаларды шешу сайыстарын өткізді.
Іс – шаралар танымдық-дамыту қалыпта өткізілді, мұғалімдер оқушылардың оқу мүмкіндіктерін ескеретін, логика мен зеректілікке арналған тапсырмаларды пайдаланды, ал оқушылар әр түрлі пәндерден өз білім дәрежелерін, тапқырлықтарын көрсетіп, қосымша да білім алды.
Онкүндік қорытындысы ретінде математикалық кеш өткізілді. Кеште 5-9-сынып оқушылары өнер көрсетті. Жүргізушілері 10-11 сынып оқушылары болды. Кеште көрермендерге математикалық жұмбақтар, логикалық есептер мен қызықты сұрақтар қойылды. Сайыстардың жеңімпаздары мен кеште өнер көрсеткен оқушылар арнайы дипломдармен марапатталды. Қорыта келе айтарым, ұстаз-жас ұрпақтың рухани сәулеткері және қоғам, халық өзінің үміті мол болашағын тапсыратын сенімді өкілі. Ұстаз – әрі ғалым, әрі шешен, әрі көшбасшы бола білсе ғана алдында отырған шәкірті білімді болады, болашақта ел тұтқасын берік ұстар азамат болады.
